🔶 බෞද්ධයෙකු වශයෙන් දතයුතු මූළික කරුණු ඇතුළත් පොත්

°°°°°°°°°°°°°°°°°°°°°°°°°°°°°°°°°°°°°°°°°°°°°°°

(1) බෞද්ධයාගේ අත්පොත 

========================

බොද්ධකම උපතින් හිමිවන්නක් නොවේ. නියම බෞද්ධයාට අවශ්‍ය මූලික දැනුම ලබා ගැනීමටත්, බෞද්ධයෙකු වශයෙන් හැසිරීමට අවශ්‍ය හැදියාව ලබා ගැනීමටත් මුලින්ම කියවිය යුතු පොතකි.

(2) පුණ්‍යෝපදේශය 

=================

බෞද්ධයන් කරන වන්දනා පූජා දෙක උසස් ප්‍රතිඵල ලැබෙන අයුරින් කරන හැටිත්, ග්‍රහ අපල, අමනුෂ්‍ය දෝෂ දුරුකරගන්නා ආගමික විධිත්, මෙලොව පරලොව සාර්ථක කරගැනීමට බෞද්ධයෙකු වශයෙන් කළ යුතු වැඩත් මාතෘකා 14ක් යටතේ විස්තර කළ පොතකි.

(3) සූවිසි මහා ගුණය

===================

තෙරුවන් ගුණ සූවිස්ස (24) ශ්‍රද්ධා භක්තිය උපදවන ආකාරයෙන් විස්තර කර ඇති පොතකි. බෞද්ධ සාහිත්‍ය කෘතියක් වශයෙන් ද රසවත් ව කියවිය හැකිය.

(4) මංගල ධර්ම විස්තරය

======================

මහා මංගල සූත්‍රයේ ඇතුළත් මෙලොව පරලොව යහපත පිනිස හේතු වන මංගල කරුණු 38 සරලව පැහැදිලි කරයි. ජීවිතය සාර්ථක කරගැනීම සඳහා ආගම් භේදයකින් තොරව හැමදෙනා විසින්ම කියවිය යුතු ග්‍රන්ථයකි.

(5) පොහොය දිනය

=================

සීල සමාදානය සාර්ථක කරගැනීම සඳහා කියවිය යුතු පොතකි. පොහෝ දින කළ යුතු වන්දනා පූජා භාවනා ආදී කටයුතු පිළිබඳව විස්තර කර ඇත.

(6) බෝධි පූජාව

==============

අද බහුලව කෙරෙන පිංකමකි බෝධි පූජාව. නියම ප්‍රතිඵල ලැබිය හැකි අන්දමින් බෝධි පූජාව කරන ආකාරය මේ පොතින් දැනගත හැකිය.

(7) බුද්ධ නීති සංග්‍රහය

====================

සත්තවයාගේ මෙලොව පරලොව යහපතටත්, නිවන් ලැබීමටත් උපකාර වන ධර්ම විස්තර කරන පොතකි. පිටකත්‍රයේ පැතිර පවත්නා උපදේශ ගාථා 550 ක් ඇසුරින් කාහටත් ප්‍රයෝජනවත් සේ සකසා ඇති මේ පොත ඉගැන්වීමට ද සුදුසු ය.

(8) බෝධිපාක්ෂික ධර්ම විස්තරය

=============================

බුදු, පසේබුදු, මහරහත් යනුවෙන් නිවන් දැකිය හැකි බෝධි තුනකි. එම සත්‍යාවබෝධය ලබාගැනීමට උපකාර වන ධර්ම 37 විස්තර කරන, නිවන් පතන්නන් විසින් කියවිය යුතු පොතකි.

(9) පාරමිතා ප්‍රකරණය

====================

නිවන් ලැබීම උදෙසා කරන පින්කම් පාරමිතා නම් වේ. ඒවා දහයකි. මේ පොතින් එම දහම් කරුණු විස්තර කරන අතර, පාරමිතා වඩන ආකාරය පැහැදිලි කරයි.

(10) ධර්ම විනිශ්චය

==================

ධර්මය නොදැනීම හේතුවෙන් බෞද්ධයන් අතර ඇතිවන විතර්කයන්ට පිළිතුරු වශයෙන් ප්‍රශ්න 100 ක් අලලා සකස් කර ඇති පොතකි. 

(11) නිර්වාණ විනිශ්චය හා පුනුරුප්පති ක්‍රමය

=================================

බෞද්ධයන්ගේ ප්‍රධාන බලාපොරොත්තුව වූ නිර්වාණය පිළිබඳ විස්තර ඇතුළත් පොතකි. පුනුරුප්පති ක්‍රමයෙන් සත්ත්වයා නැවත නැවත භවයේ උපදින ආකාරය පැහැදිලි කරයි.

🔶 අභිධර්මය හදාරන්නන්ට සහ මනෝවිද්‍යාත්මකව බුදුදහම අගය කරන්නන්ට වැදගත් පොත්

°°°°°°°°°°°°°°°°°°°°°°°°°°°°°°°°°°°°°°°°°°°°°°°

(12) අභිධර්මයේ මූලික කරුණු

===========================

චතුරාර්‍ය් සත්‍යය අවබෝධ කරගැනීමට අභිධර්මය පිළිබඳ තරමක හෝ දැනීමක් තිබීම ප්‍රයෝජනවත් ය. මේ පොත කියවීම අභිධර්මය ඉගෙනීමට ද හොඳ පදනමකි.

(13) අභිධර්ම මාර්ගය

====================

නිරවුල්ව හා නිවැරදිව පහසුවෙන් අභිධර්මය හැදෑරීම සඳහා පිළියෙළ කර ඇති, දහම් විභාග සඳහා සුදුසු පොතකි. අභිධර්මාර්ථ සංග්‍රහය අනුව  ලියවී ඇත.

(14) වඤ්චක ධර්ම හා චිත්තෝපක්ලේශ ධර්ම

=================================

අකුසලයන්ගෙන් මිදීම පිණිස සිත කිලිටි කරන ධර්ම ගැන අවබෝධයක් තිබිය යුතුය. "වත්ථ" සූත්‍රයේ දක්වා ඇති චිත්තෝපක්ලේශ ධර්ම පැහැදිලි කරමින් ලියා ඇත. කුසලාකාරයෙන් ඉදිරිපත් වී සිත රවටන චිත්ත ස්වභාව පැහැදිලි කරන වඤ්චක ධර්ම පොත බොහෝ උගතුන්ගේ පැසසුමට ලක් වී ඇත. මේ පිළිබඳව ලියවුණු එකම පොතයි.

(15) කෙලෙස් එක්දහස් පන්සියය

=============================

නොයෙක් වර අසන්නට ලැබෙතත් මේ ගැන දන්නන් විරලය. කෙලෙස් වශයෙන් ඉදිරිපත් වන චිත්ත ස්වභාවයන්ගේ අනේකාකාර විස්තර කරන පොතකි.

(16) පට්ඨාන මහා ප්‍රකරණ සන්නය

==============================

පට්ඨානය අභිධර්ම පිටකයේ අන්තිම පොතයි. පට්ඨාන ප්‍රකරණය උගත යුතු ආකාරය පැහැදිලි කරන මේ පොතෙහි ප්‍රස්තාවනාව කතෘගේ අබිදම් දැනුම ප්‍රකට කරයි.

(17) අනුවාද සහිත අභිධර්මාර්ථ සංග්‍රහය

================================

අභිධර්මය ඉගෙනීම සඳහා මුලින්ම වනපොත් කරන අභිධර්මාර්ථ සංග්‍රහයට කළ සරල සිංහල අනුවාදයකි.

🔶 භාවනා කරන්නවුන්ට විශේෂයෙන් ප්‍රයෝජනවත් පොත්

°°°°°°°°°°°°°°°°°°°°°°°°°°°°°°°°°°°°°°°°°°°°°°°

(18) චතුරාර්‍ය් සත්‍යය

==================

බුදුරජාණන් වහන්සේලා ලොව පහළ වන්නේ චතුරාර්‍ය් සත්‍යය දේශනා කරනු පිණිසය. ලෝකෝත්තර මාර්ග ඵල ලැබීමට නම් චතුරාර්‍ය් සත්‍යය අවබෝධ කළ යුතුය. කාටත් පහසුවෙන් තේරුම් ගත හැකි සේ චතුරාර්‍ය් සත්‍යය ධර්මය පැහැදිලි කරන පොතකි.

(19) විදර්ශනා භාවනා ක්‍රමය

=========================

කෙලින්ම නිවන් ලබා දෙන පිංකම විදර්ශනා භාවනාවයි. විදර්ශනා වඩන බොහෝ ක්‍රම අතුරින් පහසුවෙන් ප්‍රතිඵල ලැබිය හැකි ක්‍රමයක් විස්තර කරයි.

(20) චත්තාළිසාකාර මහා විපස්සනා භාවනාව

===============================

විදර්ශනා ඥානය දියුණු වීම සඳහා භාවනා කරන්නවුන් විසින් කියවීමට සුදුසු පොතකි.

(21) සතිපට්ඨාන භාවනා ක්‍රමය

===========================

දැනට කඳුබොඩ ආදී විපස්සනා භාවනා මධ්‍යස්ථානවල පුහුණු කරන භාවනා ක්‍රමය ධර්මානුකූලව විස්තර කරයි.

(22) පටිච්ච සමුප්පාද විවරණය

===========================

හේතු-ප්‍රත්‍ය න්‍යාය පැහැදිලි කරන බුදුදහමේ ගැඹුරු දහම් කොටසක් විස්තර කරන පොතකි. සියලු බෝසත්වරුන් බුදුවන දින රාත්‍රී පශ්චීම යාමයේ භාවනාවක් වශයෙන් මෙනෙහි කරන පටිච්ච සමුප්පාදය හේතු උදාහරණ උපමා සහිතව විවරණය කර ඇත.

විනය අභිලාෂීන්ට හා පැවිදි බවට පත්වූ හිමිවරුනට ප්‍රයෝජනවත් පොත්

(23) ශාසනාවතරණය

====================

උපසම්පන්න හා අනුපසම්පන්න භික්ෂූන් වහන්සේටත් සිල් මාතාවන්ටත් අත් පොතක් වශයෙන් භාවිතයට සුදුසු ය. පැවිදි වන්නට අපේක්ෂා කරන්නන් මුලින්ම මේ පොත කියවීම මැනවි.

(24) උපසම්පදා සීලය

===================

විනය නොදැන උපසම්පදා වීම නපුරකි. උපසම්පදා ශීලය පහසුවෙන් තේරුම් ගත හැකි සේ විග්‍රහ කරන පොතකි.

(25) විනය කර්ම පොත

=====================

පැවිදි කිරීම උපසම්පදා කිරීම හා බන්ධනය කිරීම ආදී විනය කර්මයන් ගැන පැහැදිලි විස්තරයකි.

(26) අනුවාද සහිත උභය ප්‍රාතිමෝක්ෂය 

=================================

මුලින්ම වනපොත් කරන විනය අත් පොතකි. පෙළ සහිත සරල සිංහල අනුවාදයෙන් යුක්තයි.

-

-

-

-

-

මෙම උතුම් වූ ධර්ම දානය අප සියලු දෙනාටම මේ ගෞතම බුද්ධ ශාසනයේදීම කෙටිම කාලයකින් පහසුම ආකාරයෙන් සුඛ ප්‍රතිපදාවෙන් අජර අමර වූ නිවනින් සැනසීම පිනිස හේතු වාසනා වේවා! 

අවම වශයෙන් මේ ජීවිතයේදී ම සතර අපායෙන් සදහටම නිදහස් වීම පිනිස ඒකාන්තයෙන්ම හේතු උපනිශ්‍රය වේවා!

සාදු සාදු සාදු 🙏🌼🙏🌼🙏